您现在的位置： 首页 >> 历史专题 

命中唔曾带桃花
石灰粉壁爱捞沙，
连妹唔知哪样差。
十字街头算张命，
命中唔曾带桃花。

竹子细细唔晓长，
妹子细细唔想郎。
等加几年十七八，
日想山歌夜想郎。

河里洗脚沙对沙，
对面新屋就系涯。
妹系有心转来嬲，
莫来假作过路侪。

阿妹生得白飘飘，
人又斯文声又娇。
身材相貌涯遂意，
难怪阿妹眼价高。

阿鹊含杈屋背落，
细妹约涯无定着。
妹子约涯月光出，
害涯等到月光落。

南门一出三条河，
涯唱山歌妹爱和。
和得涯赢食杯酒，
和输畀涯做老婆。

松树顶上插大旗，
招兵买马过广西。①
世乱纷纷同妹嬲，
嬲哩一时正一时。
① 此首清代山歌，反映当时太平天国起义时的情况。太平天国领袖洪秀全上祖是梅县石坑人，其妻赖氏亦为梅州人。起义时曾在梅州“招兵”过广西。

松树顶上出月光，
松树底下插品香。
保佑月光云遮等，
好带涯妹出外乡。

细妹约涯竹头下，
露水茫茫竹叶遮。
竹叶遮郎郎遮妹，
冤枉娇容在底下。

先日同你太慌张，
唔曾讲过情几长。
河里宰鸡失内腹，
水深难摸妹心肠。

对面妹子一堆堆，
一只过好面傲开。
蛤蟆有肉遁等走，
蟾蜍无肉跳等来。

入园摘菜皮皮青，
失脚踏倒妹脚　。
人话同妹有手脚，
无手无脚样般行。

入园摘菜皮皮新，
自家摘菜自家淋。
自家淋菜自家摘，
别人一摘就伤心。

食烟爱食两筒烟，
连妹爱同两同年。
便背就话同年嫂，
当面就喊嫩娇连。

一想你来夜想你，
一日想你十二时。
初一想到二十九，
想来想去月尽哩。

想来想去月尽哩，
妹今同郎约个时。
子午寅卯闲唔得，
决意辰巳午未时。

决意辰巳午未时，
辰巳午未来等你。
申酉戌亥无面见，
子丑寅卯魂净哩。

子丑寅卯魂净哩。
约到阿哥就月期。
白马跌落湖洋　，
唔得身净畀郎骑。

唔得身净畀郎骑。
害哥费撇多心机。
脚布洗面有袜味，
茶叶番渣淡撇哩。

人带面目树带皮
（男女对唱）
当今世界太唔同，
莫论亲疏并内宗。
只爱齐家真心爱，
下面事情爱通融。

通融个事理唔该，
剪刀无铰口难开。
三寸绫罗做裤着，
紧想紧真做唔来。

做唔来时也系理，
风流就讲少年时。
人家爱讲由渠讲，
塞等耳公诈唔知。

塞等耳公诈唔知。
莫把大事当儿嬉。
三分热情一生苦，
人带面目树带皮。

面目看来人人有，
风流快活唔好丢。
一生青春有几久，
莫怕闲言莫怕羞。
唔怕羞来贱了身，
八九两称唔正斤。
人人都话下贱鬼，
看来灯芯无柬轻。

莫来看轻又看重，
有银有钱正威风。
一三五七同妹嬲，
二四六八满身双。

满身双来系一时，
单重马褂系无“里”。
桔子打来唔像柿，
鸡毛打鼓扫面皮。

鸡毛打鼓当闲情，
且看世上赚钱人。
三日唔做偷鸡贼，
人人都话系乡绅。

人人都话系乡绅，
系人系鬼爱看清。
贪财贪色会变坏，
唔嫖唔赌过本真。

唔嫖唔赌过本真，
猪油点火涯荤明。
阿哥今年三十出，
可怜至今打单身。

可怜至今打单身，
哥今单身系可怜。
只爱你今立志气，
扭紧毛辫做赢人。

扭紧毛辫做赢人，
无人帮手也闲情。
一只巴掌拍唔响，
一只草鞋难上京。

一只草鞋难上京，
为人做事靠真心。
你系真心办真事，
铁杵磨成绣花针。

铁杵磨成绣花针，
妹个言语哥记心。
打过斧头换过柄，
唔嫖唔赌做好人。